Die Boland-Kavaliers kan Saterdag op Vodacompark ’n soortgelyke aanslag van die Vodacom-Vrystaat-Cheetahs verwag as wat die kampioen verlede Vrydagaand in Brakpan teen die Valke gelewer het.
Hoewel die Vodacom Vrystaat Cheetahs nie soos teen die Valke streng daarop gerig sal wees om hul punteverskil op die Absa Curriebeker-puntelys ’n hupstoot te gee nie, het die Vrystaters steeds ’n bonuspunt vir vier of meer drieë saam met ’n oorwinning nodig om die halfeindronde te haal.
Naka Drotské, Vodacom Vrystaat Cheetah-afrigter, het gister gesę sy span sal nie sommer afwyk van sy wedstrydplan wat teen die Valke gewerk het nie – hoewel dit nie risiko-rugby veronderstel nie.
Volgens Drotské het sy span met die nodige selfbeheersing teen die Skarlakenrooies gespeel en moet dit bloot herhaal word in die wedstryd teen die Kavaliers.
Die losskakel, Jacques-Louis Potgieter, is in die sleutelposisie behou en is ’n aanvallende speler wat Saterdag straks ook vryheid sal kry om die Vodacom Vrystaat Cheetah-agterlyn na wense weg te stuur.
“Ek dink Jacques-Louis was regtig goed teen die Valke, want wanneer hy in ons eie kwartgebied geskop het, moes hy skop,” het Drotské gesę.
“Maar die kere wat hy met die bal gehardloop het, was daar nie een keer wat die geleentheid aan die buitekant nie daar was nie. Ek dink dit sal presies dieselfde bly,” glo die afrigter. “Ek dink nie ons gaan hoërisiko-rugby speel nie, maar ons het dit ook nie teen die Valke gedoen nie.”
Boland se span is gister aangewys en volgens Hawies Fourie, agterspeler-afrigter van die Vodacom Vrystaat Cheetahs, is daar min spanlede oor van toe hy (Fourie) nog verlede jaar Boland se hoofafrigter was.
Twee spelers wat volgende jaar vir Vrystaat kom speel, die linkervleuel Danwel Demas en plaasvervanger-stut Jean Botha, is in die Kavaliers se 22-tal vir Saterdag se wedstryd.
“In die 22-tal wat teen WP gespeel het, was daar net agt spelers wat verlede jaar daar was toe ek daar weg is. So dis ’n klomp nuwe spelers.
“Hulle is ’n span met durf en gee nie moed op nie. Hulle verdediging is nogal goed,” het Fourie gesę.
Die Kavaliers sal ongetwyfeld ’n herhaling van verlede jaar se wedstryd in Bloemfontein wil voorkom toe die Vodacom Vrystaat Cheetahs 91-3 geseëvier het en Fourie verwag geen maklike wedstryd nie.
“Die Valke is ’n makliker span om te takel as Boland, dus gaan dit nie net eenrigting-verkeer wees nie.”
Boland se span is:
Justin Peach; Deon Scholtz, Piet van Zyl (k), Dewey Swartbooi, Danwel Demas; Elgar Watts, Marnus Hugo; David Hendricks, Josh Strauss, Zolani Mofu, Nico Esterhuyse, Cecil Kemp, Jacobie Adriaanse, Pieter Wium, Janro van Niekerk. PLAASVERVANGERS: Clemen Lewis, Jean Botha, Johan Peacock, Angelo Brinkhuys, Neil Papier, Hein Myburgh, Lionel Cornelius.
- TV : Saterdag van 14:45 af op SS6/DStv.
- Besoek die skrywer se rugby-blog, Rugby-redekawel, op Volksblad se webtuiste – www.volksblad.com
Pieter Jordaan |